ᱰᱳ. ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ

ᱰᱳ. ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ

ᱰᱳ. ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ
(᱓᱑.᱐᱗.᱑᱙᱓᱙ᱼ᱑᱘.᱐᱘.᱒᱐᱒᱐)

ᱰᱨ. ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢᱟᱜ ᱡᱟᱱᱟᱢ ᱫᱚ ᱰᱩᱢᱠᱟᱹ ᱡᱤᱞᱟᱹ, ᱥᱤᱠᱟᱨᱤᱯᱟᱲᱟ ᱛᱷᱟᱱᱟ ᱛᱟᱹᱨᱤᱨᱮ ᱢᱮᱱᱟᱜ ᱵᱮᱱᱟᱜᱟᱲᱤᱭᱟ ᱟᱛᱳᱨᱮ ᱓᱑/᱐᱗/᱑᱙᱓᱙ ᱥᱮᱨᱢᱟᱨᱮ ᱦᱳᱭᱞᱮᱱᱛᱟᱭᱟ᱾ ᱟᱡᱨᱮᱱ ᱟᱯᱟᱛᱟᱜ ᱧᱩᱛᱩᱢ ᱫᱚ ᱢᱩᱱᱥᱤ ᱦᱮᱢᱵᱽᱨᱚᱢ ᱟᱨ ᱟᱡᱨᱮᱱ ᱫᱩᱞᱟᱹᱲᱤᱭᱟ ᱮᱝᱜᱟᱛᱛᱮᱫᱼᱟᱜ ᱧᱩᱛᱩᱢ ᱫᱚ ᱯᱟᱨᱣᱟᱛᱤ ᱢᱩᱨᱢᱩ ᱛᱟᱦᱮᱸᱠᱟᱱᱛᱟᱭᱟ᱾ ᱟᱡᱨᱮᱱ ᱥᱚᱱᱚᱛ ᱡᱩᱨᱤᱭᱟᱜ ᱧᱩᱛᱩᱢ ᱫᱚ ᱮᱞᱵᱤᱱᱟ ᱢᱩᱨᱢᱩ ᱠᱟᱱᱛᱟᱭᱟ᱾ ᱢᱟᱱ ᱰᱨ. ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢᱟᱜ ᱢᱩᱞ ᱟᱛᱳ ᱫᱚ ᱯᱟᱠᱚᱲ ᱡᱤᱞᱟᱹ, ᱯᱟᱹᱠᱟᱹᱲᱤᱭᱟᱹ ᱛᱷᱟᱱᱟ ᱛᱟᱹᱨᱤᱨᱮ ᱢᱮᱱᱟᱜ ᱞᱩᱠᱷᱤᱯᱚᱹᱠᱷᱚᱹᱨ ᱠᱟᱱᱟ᱾ ᱟᱡ ᱵᱟᱵᱟ ᱫᱚ ᱵᱮᱱᱟᱜᱟᱲᱤᱭᱟ ᱢᱤᱥᱚᱱᱨᱮᱱ ᱯᱟᱥᱴᱚᱨᱮ ᱛᱟᱦᱮᱸᱠᱟᱱᱛᱮ ᱩᱱᱤ ᱫᱚ ᱚᱱᱰᱮᱜᱮ ᱰᱮᱨᱟᱭᱮᱱᱟ ᱟᱨ ᱱᱳᱝᱠᱟ ᱞᱮᱠᱟᱛᱮ ᱵᱮᱱᱟᱜᱟᱲᱤᱭᱟᱨᱮᱱ ᱵᱟᱹᱥᱤᱱᱫᱟᱠᱳ ᱦᱳᱭᱮᱱᱟ᱾ 

ᱢᱟᱱ ᱚᱱᱚᱞᱤᱭᱟᱹᱛᱟᱠᱳ ᱫᱚ ᱮᱭᱟᱭ ᱵᱳᱭᱦᱟᱠᱳ ᱢᱳᱫᱽᱨᱮ ᱟᱡ ᱫᱚ ᱛᱟᱞᱟᱭᱤᱡᱼᱮ ᱛᱟᱦᱮᱸᱠᱟᱱᱟ᱾ ᱟᱡ ᱠᱷᱚᱱ ᱞᱟᱹᱴᱩᱭᱤᱡ ᱫᱚ ᱠᱚᱨᱱᱮᱞᱤᱭᱩᱥ ᱟᱨ ᱟᱡ ᱠᱷᱚᱱ ᱠᱟᱹᱴᱤᱡᱼᱤᱡ ᱫᱚ ᱞᱟᱡᱟᱨᱤᱣᱥ᱾ ᱱᱩᱭ ᱫᱚ ᱱᱤᱛᱚᱜ ᱞᱩᱠᱷᱤᱯᱚᱹᱠᱷᱚᱹᱨ ᱟᱛᱳᱨᱮᱱ ᱢᱟᱹᱧᱡᱷᱤ ᱵᱟᱵᱟᱜᱮ᱾ ᱠᱩᱨᱤ ᱵᱳᱭᱦᱟᱠᱳ ᱫᱚ ᱞᱳᱣᱤᱥ, ᱛᱟᱯᱟᱱᱮᱥ, ᱠᱟᱨᱩᱱᱟ ᱟᱨ ᱢᱟᱹᱨᱤᱭᱟᱹᱢ ᱦᱮᱢᱵᱽᱨᱚᱢ᱾

ᱢᱟᱱ ᱰᱨ. ᱛᱤᱢᱳᱛᱷᱮᱭᱟᱥᱟᱜ ᱮᱛᱚᱦᱚᱵ ᱥᱤᱠᱷᱱᱟᱹᱛ ᱫᱚ ᱞᱳᱣᱟᱹᱨ ᱯᱟᱨᱟᱭᱢᱟᱨᱤ ᱥᱠᱩᱞ ᱵᱮᱱᱟᱜᱟᱲᱤᱭᱟ ᱠᱷᱚᱱ ᱮᱦᱚᱵᱞᱮᱱᱛᱟᱭᱟ᱾ ᱩᱱᱤ ᱫᱚ ᱠᱟᱹᱴᱤᱡ ᱩᱢᱮᱨ ᱠᱷᱚᱱᱜᱮ ᱚᱞᱚᱜ ᱯᱟᱲᱦᱟᱣᱜᱨᱮ ᱟᱹᱰᱤ ᱡᱷᱩᱸᱠᱟᱹᱞᱮ ᱛᱟᱦᱮᱸᱠᱟᱱᱟ᱾ ᱟᱡ ᱵᱟᱵᱟ ᱯᱟᱥᱴᱚᱨᱮ ᱛᱟᱦᱮᱸᱠᱟᱱᱛᱮ ᱠᱟᱹᱴᱤᱡ ᱠᱷᱚᱱᱜᱮ ᱫᱷᱚᱨᱚᱢ ᱥᱮᱡᱛᱮ ᱟᱹᱰᱤ ᱠᱮᱴᱮᱡ ᱵᱤᱥᱣᱟᱹᱥᱤ ᱞᱮᱠᱟᱛᱮ ᱨᱮᱦᱮᱫᱼᱟᱠᱟᱱ ᱛᱟᱦᱮᱸᱠᱟᱱᱟ᱾ ᱞᱳᱣᱟᱹᱨ ᱯᱟᱨᱟᱭᱢᱟᱨᱤ ᱯᱟᱥᱠᱮᱫ ᱛᱟᱭᱚᱢ ᱩᱱᱤ ᱫᱚ ᱫᱩᱢᱠᱟᱹ ᱡᱤᱞᱟᱹᱨᱮ ᱢᱮᱱᱟᱜ ᱠᱟᱭᱨᱟᱵᱟᱱᱤ ᱥᱟᱱᱛᱟᱞ ᱦᱟᱭ ᱥᱠᱩᱞ ᱨᱮᱭ ᱵᱷᱩᱨᱛᱤᱭᱱᱟ ᱟᱨ ᱚᱱᱰᱮ ᱠᱷᱚᱱᱜᱮ ᱩᱱᱤ ᱫᱚ ᱢᱮᱴᱨᱤᱠ ᱵᱤᱰᱟᱣᱮ ᱯᱟᱥᱞᱮᱫᱟ᱾ 

ᱢᱮᱴᱨᱤᱠ ᱯᱟᱥᱠᱮᱫ ᱛᱟᱭᱚᱢ ᱩᱱᱤ ᱫᱚ ᱵᱮᱱᱟᱜᱟᱲᱤᱭᱟᱨᱮ ᱢᱮᱱᱟᱜ ᱞᱩᱛᱷᱮᱨᱟᱱ ᱛᱷᱮᱣᱞᱳᱜᱤᱪᱟᱞ ᱥᱮᱢᱤᱱᱟᱨᱭ ᱨᱮ ᱫᱷᱚᱨᱚᱢ ᱟᱹᱠᱤᱞ ᱦᱟᱨᱟ ᱵᱩᱨᱩᱭ ᱞᱟᱹᱜᱤᱫ ᱤᱥᱨᱚᱲ ᱥᱟᱥᱛᱚᱨ ᱯᱟᱲᱦᱟᱣᱜ ᱞᱟᱹᱜᱤᱫᱼᱮ ᱵᱷᱩᱨᱛᱤᱭᱱᱟ᱾ ᱩᱱ ᱡᱚᱠᱷᱮᱱ ᱥᱮᱢᱤᱱᱟᱨᱭ ᱨᱮᱱ ᱯᱨᱤᱱᱪᱤᱯᱟᱞ ᱞᱮᱠᱟᱛᱮ ᱛᱷᱮᱣᱞᱳᱜᱤᱭᱟᱱ ᱡᱳᱦᱟᱱᱱᱮᱥ ᱛᱷᱳᱯᱷᱛ ᱠᱨᱳᱜᱽ'ᱮ ᱛᱟᱦᱮᱸᱠᱟᱱᱟ᱾ ᱥᱮᱢᱤᱱᱟᱨᱤ ᱯᱟᱥᱠᱮᱫ ᱛᱟᱭᱚᱢ ᱩᱱᱤ ᱫᱚ ᱱᱟᱥᱮ ᱫᱤᱱ ᱛᱟᱭᱚᱢ ᱜᱽᱨᱮᱡᱩᱣᱮᱥᱟᱱ ᱞᱟᱹᱜᱤᱫᱛᱮ ᱭᱩᱱᱟᱭᱴᱮᱰ ᱛᱷᱮᱣᱞᱳᱡᱤᱠᱟᱞ ᱠᱳᱞᱮᱡᱽ ᱵᱮᱝᱜᱽᱞᱳᱨ, ᱠᱟᱨᱱᱟᱴᱟᱠᱟᱨᱮ (᱑᱙᱖᱘ᱼ᱑᱙᱗᱐) ᱵᱮᱪᱞᱳᱨ ᱳᱯᱷ ᱰᱤᱣᱟᱭᱱᱤᱴᱤ ᱨᱮᱭ ᱵᱷᱩᱨᱛᱤᱭᱱᱟ᱾ ᱪᱤ.ᱮᱪ ᱯᱟᱥ ᱛᱟᱭᱚᱢ ᱩᱱᱤ ᱫᱚ ᱵᱮᱱᱟᱜᱟᱲᱤᱭᱟ ᱛᱷᱮᱣᱞᱳᱡᱤᱠᱟᱞ ᱥᱮᱢᱤᱱᱟᱨᱤ ᱨᱮ (᱑᱙᱗᱐ᱼ᱗᱑) ᱪᱮᱪᱮᱫ ᱢᱟᱦᱟᱥᱚᱭ ᱞᱮᱠᱟᱛᱮᱭ ᱠᱟᱹᱢᱤᱠᱮᱫᱟ᱾ ᱯᱨᱤᱱᱥᱤᱯᱟᱠ ᱡᱮ.ᱴᱤ. ᱠᱨᱳᱜᱽ ᱟᱜ ᱩᱥᱠᱩᱨᱛᱮ ᱟᱡᱼᱟᱜ ᱟᱹᱠᱤᱞ ᱫᱟᱲᱮ ᱰᱷᱮᱨ ᱞᱟᱹᱜᱤᱫ ᱟᱨ ᱦᱚᱸ ᱞᱟᱦᱟ ᱥᱮᱡ ᱟᱹᱠᱤᱞ ᱦᱟᱹᱨ ᱞᱟᱹᱜᱤᱫᱛᱮ ᱯᱳᱥᱴ ᱜᱽᱨᱮᱡᱩᱣᱮᱥᱟᱱ ᱰᱤᱜᱽᱨᱤ ᱦᱟᱢᱮᱴ ᱞᱟᱹᱜᱤᱫ ᱟᱨ ᱢᱤᱫ ᱫᱷᱟᱣ ᱭᱩᱱᱟᱭᱴᱮᱰ ᱛᱷᱮᱣᱞᱳᱡᱤᱠᱟᱞ ᱠᱳᱞᱮᱡᱽ ᱵᱮᱝᱜᱽᱞᱳᱨ ᱛᱮᱭ ᱪᱟᱞᱟᱣᱮᱱᱟ᱾ ᱮᱢ.ᱴᱤ.ᱮᱪ. ᱨᱮ ᱩᱱᱤᱭᱟᱜ ᱠᱷᱟᱥ ᱵᱤᱥᱟᱹᱭ ᱞᱮᱠᱟᱛᱮ 'ᱳᱞᱰ ᱴᱮᱥᱴᱢᱮᱱᱴ ᱛᱟᱦᱮᱸᱠᱟᱱᱛᱟᱭᱟ᱾ ᱩᱱᱤ ᱫᱚ ᱚᱱᱰᱮ ᱑᱙᱗᱑ ᱠᱷᱚᱱ ᱑᱙᱗᱓ ᱦᱟᱹᱵᱤᱡᱼᱮ ᱯᱟᱲᱦᱟᱣᱮᱱᱟ ᱟᱨ ᱟᱡᱨᱮᱱ ᱜᱩᱨᱩᱠᱳᱣᱟᱜ ᱵᱩᱫᱽ ᱵᱟᱛᱞᱟᱣᱛᱮ ᱟᱹᱰᱤ ᱱᱟᱯᱟᱭᱛᱮ ᱮᱢ. ᱛᱷᱮᱣᱞᱳᱞᱳᱡᱤ ᱯᱟᱥ ᱠᱮᱫᱟ᱾ ᱥᱮᱨᱟᱢᱯᱳᱨ ᱠᱳᱞᱮᱡᱽ ᱥᱮᱨᱟᱢᱯᱳᱨ (ᱭᱩᱱᱤᱵᱷᱟᱨᱥᱤᱴᱤ) ᱦᱳᱛᱮᱛᱮ ᱐᱑ ᱯᱷᱮᱵᱽᱨᱩᱣᱟᱨᱤ ᱑᱙᱗᱕ ᱥᱟᱞᱨᱮ ᱦᱳᱭᱞᱮᱱ ᱠᱚᱵᱽᱣᱳᱠᱮᱥᱟᱱ ᱨᱮ ᱩᱱᱤ ᱫᱚ ᱮᱢ.ᱴᱤ.ᱮᱪ. ᱨᱮᱭᱟᱜ ᱢᱟᱱ ᱥᱟᱠᱟᱢᱠᱳ ᱮᱢᱟᱣᱟᱫᱮᱭᱟ᱾ 

ᱢᱟᱥᱴᱟᱹᱨ ᱳᱯᱷ ᱛᱷᱤᱭᱳᱞᱳᱡᱤᱠᱟᱞ ᱨᱮᱭᱟᱜ ᱢᱟᱱ ᱥᱟᱠᱟᱢ ᱦᱟᱢᱮᱴᱠᱮᱫ ᱛᱟᱭᱚᱢ ᱩᱱᱤ ᱫᱚ ᱢᱮᱜᱷᱟᱞᱟᱭ ᱨᱟᱡᱽᱨᱮ ᱢᱮᱱᱟᱜ ᱪᱮᱨᱟᱯᱩᱱᱡᱤ ᱨᱮᱭᱟᱜ ᱪᱮᱨᱟ ᱛᱷᱤᱭᱳᱞᱳᱡᱤᱠᱟᱞ ᱠᱳᱞᱮᱡᱽ ᱨᱮ ᱑᱙᱗᱓ ᱠᱷᱚᱱ ᱑᱙᱗᱗ ᱦᱟᱹᱵᱤᱡ ᱯᱨᱳᱯᱷᱮᱥᱥᱳᱨ ᱞᱮᱠᱟᱛᱮᱭ ᱠᱟᱹᱢᱤᱠᱮᱫᱟ᱾ ᱚᱱᱰᱮ ᱯᱳᱱ ᱥᱮᱨᱢᱟ ᱠᱟᱹᱢᱤᱠᱮᱫ ᱛᱟᱭᱚᱢ ᱩᱱᱤ ᱫᱚ ᱠᱚᱞᱠᱟᱛᱟᱨᱮ ᱢᱮᱱᱟᱜ ᱵᱤᱥᱳᱵᱥ ᱪᱳᱞᱞᱮᱜᱮ ᱨᱮ ᱱᱩᱠᱨᱤ ᱠᱷᱚᱱ ᱡᱤᱨᱟᱹᱣᱜ ᱦᱟᱹᱵᱤᱡ ᱚᱱᱰᱮᱜᱮ ᱯᱨᱳᱯᱷᱮᱥᱥᱳᱨ ᱞᱮᱠᱟᱛᱮ ᱠᱟᱹᱢᱤᱞᱠᱮᱫᱟ᱾

ᱵᱤᱥᱳᱵᱽ'ᱥ ᱠᱳᱞᱮᱡᱽ ᱠᱳᱞᱠᱟᱛᱟᱨᱮ ᱠᱟᱹᱜᱢᱤ ᱡᱚᱠᱷᱮᱱᱜᱮ ᱩᱱᱤ ᱫᱚ ᱟᱡᱨᱮᱱ ᱢᱟᱨᱮ ᱜᱩᱨᱩ ᱡᱳᱦᱟᱱᱥ ᱛᱷᱳᱯᱷᱴ ᱠᱨᱳᱜᱽ'ᱟᱜ ᱥᱤᱯᱷᱟᱨᱤᱥᱛᱮ ᱰᱳᱠᱴᱟᱨᱮᱴ ᱫᱮᱜᱽᱨᱤ (ᱯᱤ.ᱮᱪ.ᱰᱤ) ᱞᱟᱹᱜᱤᱫᱛᱮ ᱟᱹᱛᱮ ᱧᱟᱢᱠᱮᱫᱟ᱾ ᱩᱱᱤ ᱫᱚ ᱠᱳᱞᱮᱡᱽ ᱠᱷᱚᱱ ᱪᱷᱩᱴᱤ ᱦᱟᱛᱟᱣᱠᱟᱛᱮ ᱥᱳᱣᱛᱷ ᱮᱥᱤᱭᱟ ᱨᱤᱥᱟᱨᱪ ᱤᱱᱥᱴᱤᱪᱭᱩᱴ ᱵᱮᱝᱜᱽᱞᱳᱨ ᱨᱮ ᱟᱡᱼᱟᱜ ᱧᱩᱛᱩᱢᱮ ᱚᱞ ᱳᱪᱳᱠᱮᱫᱟ᱾ ᱨᱮᱱᱛᱷᱤ ᱠᱮᱭᱛᱤᱡᱟᱱ ᱟᱨ ᱱᱤᱨᱢᱟᱞ ᱢᱤᱱᱡᱽ ᱛᱟᱹᱠᱤᱱᱟᱜ ᱥᱳᱛᱳᱜ ᱥᱳᱞᱦᱟ ᱞᱮᱠᱟᱛᱮ ᱩᱱᱤᱭᱟᱜ ᱠᱷᱚᱱᱫᱽᱨᱚᱱᱫᱽ ᱵᱤᱥᱟᱹᱭ ᱫᱚ ᱡᱮᱢᱚᱱ ᱥᱟᱱᱛᱟᱞᱠᱳᱣᱟᱜ ᱥᱤᱨᱡᱟᱹᱣ ᱨᱮᱭᱟᱜ ᱠᱟᱹᱦᱱᱤ ᱵᱟᱵᱚᱛᱛᱮ ᱫᱚᱦᱚᱭ, ᱟᱨ ᱳᱱᱟ ᱞᱮᱠᱟᱛᱮ ᱩᱱᱤᱭᱟᱜ ᱛᱷᱮᱥᱤᱥ (ᱠᱷᱚᱱᱫᱽᱨᱚᱱᱫᱽ ᱵᱮᱵᱚᱥᱛᱟ ᱦᱳᱨᱟ) ᱫᱚ 'ᱫᱟ ᱠᱨᱤᱭᱮᱥᱟᱱ ᱱᱮᱨᱮᱴᱤᱵᱷ ᱳᱯᱷ ᱥᱟᱱᱛᱟᱞᱥ ᱮᱱᱰ ᱡᱮᱱᱮᱥᱤᱥ ᱠᱨᱤᱭᱮᱥᱟᱱ ᱱᱮᱨᱮᱴᱤᱵᱷ: ᱟ ᱯᱨᱩᱣᱤᱝ ᱤᱱᱴᱩ ᱫᱮᱭᱟᱨ ᱛᱷᱤᱭᱳᱞᱳᱡᱤ ᱢᱳᱴᱤᱯᱷᱥ" ᱦᱳᱭᱮᱱᱛᱟᱭᱟ᱾ ᱢᱟᱱ ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ ᱫᱚ ᱱᱳᱣᱟ ᱦᱟᱢᱟᱞ ᱵᱷᱟᱨ ᱟᱹᱰᱤ ᱨᱤᱠᱤᱲ ᱢᱚᱱᱮᱛᱮᱭ ᱠᱟᱹᱢᱤᱠᱮᱫᱟ ᱟᱨᱮ ᱥᱟᱹᱛᱠᱮᱫᱛᱮ ᱑᱙᱙᱑ ᱨᱮᱭ ᱡᱳᱢᱟᱠᱮᱫᱟ᱾ ᱩᱱᱤ ᱫᱚ ᱑᱙᱙᱒ ᱥᱟᱞᱨᱮ ᱰᱳᱠᱴᱟᱹᱨ ᱳᱯᱷ ᱛᱷᱮᱭᱳᱞᱳᱡᱤ ᱨᱮᱭᱟᱜ ᱢᱟᱱ ᱥᱟᱠᱟᱢᱛᱮ (ᱰᱤᱜᱽᱨᱤ) ᱢᱟᱱᱚᱛ ᱳᱪᱳᱭᱮᱱᱟ᱾

ᱢᱟᱱ ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ ᱫᱚ ᱵᱤᱥᱳᱵᱽ'ᱥ ᱠᱳᱞᱮᱡᱽ ᱨᱮ ᱠᱟᱹᱢᱤ ᱡᱚᱠᱷᱮᱡᱜᱮ ᱠᱳᱞᱠᱟᱛᱟ ᱠᱷᱚᱱ "ᱥᱟᱱᱛᱟᱞᱤ ᱠᱟᱞᱪᱟᱨᱟᱞ ᱮᱱᱰ ᱞᱤᱴᱨᱮᱨᱤ ᱥᱳᱥᱟᱭᱴᱤ" ᱦᱚᱛᱮᱛᱮ ᱪᱷᱟᱯᱟ ᱥᱚᱫᱚᱨᱚᱜᱠᱟᱱ ᱪᱟᱱᱫᱳᱠᱤᱭᱟᱹ ᱠᱷᱚᱵᱚᱨ ᱥᱟᱠᱟᱢ ᱡᱩᱜᱽᱥᱤᱨᱤᱡᱚᱞᱨᱮᱱ ᱫᱳᱥᱟᱨᱤᱡ ᱥᱟᱥᱟᱵᱲᱟᱣᱤᱡ ᱞᱮᱠᱟᱛᱮ ᱱᱳᱣ. ᱑᱙᱘᱙ ᱨᱮᱭ ᱡᱳᱲᱟᱣᱞᱮᱱᱟ᱾ ᱩᱱᱤ ᱫᱚ ᱟᱹᱰᱤ ᱡᱷᱩᱸᱠ ᱢᱚᱱᱮᱛᱮ ᱱᱳᱣᱟ ᱠᱟᱹᱢᱤᱨᱮᱭ ᱫᱷᱩᱨᱟᱹᱣᱞᱮᱱᱟ᱾ ᱩᱱᱤ ᱫᱚ ᱛᱟᱹᱯᱤᱥ ᱚᱱᱚᱞᱤᱭᱟᱹᱭ ᱛᱟᱦᱮᱸᱠᱟᱱᱛᱮ ᱡᱩᱜᱽᱥᱤᱨᱤᱡᱚᱞ ᱫᱚ ᱟᱡᱼᱟᱜ ᱫᱟᱢᱟᱱ ᱚᱱᱚᱞᱠᱳᱛᱮ ᱟᱹᱰᱤ ᱠᱤᱥᱟᱬᱞᱮᱫᱟ᱾ ᱩᱱᱤ ᱫᱚ ᱟᱡᱼᱟᱜ ᱟᱥᱚᱞ ᱧᱩᱛᱩᱢ ᱥᱟᱶᱼᱥᱟᱶᱛᱮ 'ᱠᱩᱢᱟᱹᱝ' ᱵᱟᱦᱱᱟ ᱧᱛᱩᱢᱛᱮ ᱦᱚᱸ ᱚᱱᱚᱞᱠᱳᱭ ᱚᱞᱮᱫᱠᱟᱱ ᱛᱟᱦᱮᱸᱠᱟᱱᱟ᱾ ᱩᱱᱤ ᱫᱚ 'ᱦᱩᱞᱩᱠ ᱵᱩᱞᱩᱜ ᱧᱩᱛᱩᱢᱛᱮ ᱦᱚᱸ ᱟᱭᱢᱟ ᱞᱮᱠᱟᱱ ᱠᱟᱛᱷᱟᱠᱳ ᱦᱚᱛᱮᱛᱮ ᱡᱮᱢᱚᱱ ᱨᱟᱡᱟᱹᱨᱤ, ᱫᱷᱚᱨᱚᱢ, ᱟᱛᱳ ᱥᱳᱢᱟᱡᱽ ᱨᱮᱭᱟᱜ ᱦᱚᱲ ᱦᱚᱯᱚᱱᱟᱜ ᱱᱟᱱᱟ ᱨᱚᱠᱚᱢ ᱪᱤᱛᱟᱹᱨᱠᱳᱭ ᱥᱚᱫᱚᱨᱮᱫᱠᱟᱱ ᱛᱟᱦᱮᱸᱠᱟᱱᱟ᱾ ᱩᱱᱤ ᱫᱚ ᱥᱟᱥᱟᱵᱲᱟᱣᱤᱡ ᱦᱩᱫᱟᱹᱨᱮ ᱢᱮᱭ ᱒᱐᱐᱘ ᱦᱟᱹᱵᱤᱡᱼᱮ ᱛᱟᱦᱮᱸᱠᱟᱱᱟ᱾ ᱱᱳᱣᱟ ᱚᱠᱛᱮᱨᱮ ᱡᱩᱜᱽᱥᱤᱨᱤᱡᱚᱞ ᱥᱟᱶᱦᱮᱸᱫ ᱥᱟᱠᱟᱢ ᱫᱚ ᱟᱡᱼᱟᱜ ᱪᱚᱴ ᱪᱩᱲᱟᱹᱨᱮ ᱨᱟᱠᱟᱵᱞᱮᱱᱟ᱾

ᱩᱱᱤᱭᱟᱜ ᱚᱱᱚᱞ ᱟᱨ ᱪᱷᱟᱯᱟ ᱥᱚᱫᱚᱨ ᱯᱩᱛᱷᱤᱠᱳ:ᱼ

* ᱰᱩᱭᱤᱝ ᱛᱷᱮᱭᱳᱞᱳᱡᱤ ᱣᱤᱛᱷ ᱫᱟ ᱯᱤᱯᱩᱞ ᱳᱯᱷ ᱯᱨᱤᱢᱟᱞ ᱨᱮᱞᱤᱡᱤᱭᱟᱱ ᱤᱱ ᱤᱱᱰᱤᱭᱟ: ᱟᱵᱽᱥᱮᱱᱥ ᱳᱯᱷ ᱦᱟᱭᱢᱟᱱᱥ ᱮᱱᱰ ᱯᱨᱟᱭᱡᱮᱡᱽ ᱴᱩ ᱜᱳᱰ ᱦᱮᱡᱽ ᱟ ᱛᱷᱤᱭᱳᱞᱳᱡᱤᱠᱟᱞ ᱨᱮᱡᱟᱹᱱ ᱤᱱ ᱫᱟ ᱟᱱᱥᱮᱥᱴᱨᱟᱞ ᱨᱮᱞᱤᱡᱤᱭᱟᱱ ᱳᱯᱷ ᱫᱟ ᱥᱟᱱᱛᱟᱞᱥ᱾

* ᱢᱟᱨᱟᱝ ᱵᱩᱨᱩ ᱵᱳᱝᱜᱟ ᱼ ᱑᱙᱙᱖᱾

*ᱫᱟ ᱥᱟᱱᱛᱟᱞᱥ: ᱟᱱᱛᱷᱨᱳᱯᱳᱞᱳᱡᱤᱠᱟᱞᱼᱛᱷᱤᱭᱳᱞᱳᱡᱤᱠᱟᱞ ᱨᱤᱯᱷᱞᱮᱠᱥᱟᱹᱱ ᱳᱱ ᱥᱟᱱᱛᱟᱞᱤ ᱮᱱᱰ ᱵᱤᱵᱽᱞᱤᱠᱟᱞ ᱠᱨᱤᱭᱮᱥᱟᱱ ᱴᱨᱮᱰᱤᱥᱟᱱᱥᱼ᱑᱙᱙᱖, ᱒᱐᱑᱓᱾

* ᱫᱟ ᱥᱤᱜᱽᱱᱤᱯᱷᱤᱠᱮᱱᱥ ᱳᱯᱷ ᱣᱟᱴᱟᱨ ᱤᱱ ᱫᱟ ᱳᱞᱰ ᱴᱮᱥᱴᱢᱮᱱᱴ ᱼ ᱒᱐᱐᱗᱾

* ᱥᱟᱱᱛᱟᱞ

 ᱥᱤᱨᱡᱚᱱ ᱵᱤᱱᱛᱤ ᱟᱨ ᱵᱷᱮᱫᱽ ᱵᱷᱟᱝᱜᱟᱣ ᱼ ᱒᱐᱑᱒᱾

* ᱨᱚᱦᱚᱭ ᱤᱛᱟᱹ ᱡᱟᱱᱟᱢ ᱦᱟᱨᱟᱭᱮᱱᱟ ᱟᱨ ᱡᱚᱭᱮᱱᱟ 'ᱫᱟ ᱥᱤᱰ ᱵᱳᱨ ᱯᱷᱨᱩᱭᱤᱴ ᱼ ᱑᱙᱖᱗ ᱨᱮᱭᱟᱜ ᱥᱟᱱᱛᱟᱞᱤ ᱛᱚᱨᱡᱳᱢᱟ)ᱼ ᱒᱐᱑᱗᱾

ᱢᱟᱱ ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ ᱫᱚ ᱨᱟᱹᱧᱪᱤᱨᱮ ᱢᱮᱱᱟᱜ ᱜᱳᱥᱥᱱᱟᱨ ᱛᱷᱤᱭᱳᱞᱳᱡᱤᱠᱟᱞ ᱠᱳᱞᱮᱡᱽ'ᱨᱮ ᱦᱚᱸ ᱯᱨᱳᱯᱷᱮᱥᱥᱳᱨ ᱞᱮᱠᱟᱛᱮᱭ ᱠᱟᱹᱢᱤᱞᱮᱫᱟ᱾ ᱤᱱᱟᱹ ᱛᱟᱭᱚᱢ ᱫᱚ ᱥᱟᱱᱛᱟᱞ ᱛᱷᱤᱭᱳᱞᱳᱡᱤᱠᱟᱞ ᱠᱳᱞᱮᱡᱽ ᱵᱮᱱᱟᱜᱟᱲᱤᱭᱟᱨᱮ ᱜᱮᱥᱴ ᱞᱮᱞᱪᱟᱨᱟᱨ ᱞᱮᱠᱟᱛᱮ ᱦᱚᱸᱭ ᱵᱟᱦᱟᱞᱞᱮᱱᱟ᱾ ᱱᱳᱣᱟ ᱦᱩᱫᱟᱹᱨᱮ ᱩᱱᱤ ᱫᱚ ᱵᱟᱨ ᱵᱚᱪᱷᱚᱨᱮ ᱠᱟᱹᱢᱤᱞᱮᱫᱟ᱾ ᱤᱱᱟᱹ ᱥᱟᱶ ᱥᱟᱶᱛᱮ ᱩᱱᱤ ᱫᱚ ᱟᱭᱢᱟ ᱵᱟᱱᱟᱫᱷᱟᱣᱠᱳ ᱥᱟᱶᱛᱮ ᱦᱚᱸ ᱡᱳᱲᱟᱣᱮ ᱛᱟᱦᱮᱸᱠᱟᱱᱟ᱾

ᱢᱟᱱ ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ ᱫᱚ ᱥᱟᱶᱦᱮᱸᱫᱨᱮ ᱟᱡᱼᱟᱜ ᱮᱱᱮᱢ ᱞᱟᱹᱜᱤᱫᱛᱮ ᱰᱭᱳᱥᱮᱥ ᱳᱯᱷ ᱫᱩᱨᱜᱟᱯᱩᱨ, ᱪᱟᱨᱪ ᱳᱯᱷ ᱱᱳᱨᱛᱷ ᱤᱱᱰᱤᱭᱟ ᱵᱟᱱᱟᱫᱷᱟᱣ ᱦᱚᱛᱮᱛᱮ ᱒᱐᱐᱔ᱨᱮ ᱯ.ᱳ. ᱵᱳᱰᱤᱝ ᱢᱮᱢᱳᱨᱤ ᱮᱱᱱᱩᱣᱟᱞ ᱥᱤᱨᱟᱹᱯᱟᱛᱮᱭ ᱢᱟᱱᱚᱛ ᱳᱪᱳᱣᱟᱠᱟᱱᱟ᱾

ᱢᱟᱱ ᱛᱤᱢᱳᱛᱷᱮᱭᱟᱥ ᱦᱮᱢᱵᱽᱨᱚᱢ ᱫᱚ ᱪᱟᱹᱠᱨᱤ ᱠᱟᱹᱢᱤ ᱠᱷᱚᱱ ᱡᱤᱨᱟᱹᱣᱠᱟᱛᱮ ᱦᱚᱸ ᱡᱟᱣᱜᱮ ᱥᱟᱱᱛᱟᱞᱤ ᱥᱟᱶᱦᱮᱸᱫ ᱦᱟᱨᱟ ᱵᱩᱨᱩᱭ ᱞᱟᱹᱜᱤᱫ ᱟᱹᱰᱤ ᱪᱤᱨᱜᱟᱹᱞᱮ ᱛᱟᱦᱮᱸᱠᱟᱱᱟ᱾ ᱦᱟᱲᱟᱢ ᱯᱟᱹᱨᱤᱭᱟᱹᱲᱨᱮ ᱫᱩᱲᱩᱵᱳᱜ ᱢᱩᱥᱠᱤᱞᱮ ᱵᱩᱡᱷᱟᱹᱣᱮᱫᱠᱟᱱ ᱛᱟᱦᱮᱸᱨᱮ ᱦᱚᱸ ᱠᱮ.ᱠᱮ. ᱫᱟᱛᱛᱟ ᱳᱞᱟᱜ ᱤᱝᱜᱽᱨᱟᱹᱡᱤ ᱯᱩᱛᱷᱤ "ᱫᱟ ᱥᱟᱱᱛᱟᱞ ᱤᱱᱥᱭᱩᱨᱨᱮᱠᱥᱟᱱ" ᱨᱮᱭᱟᱜ ᱥᱟᱱᱛᱟᱞᱤᱛᱮ ᱛᱚᱨᱡᱳᱢᱟ ᱵᱷᱮᱫᱽᱨᱮᱭ ᱛᱟᱦᱮᱸ ᱤᱫᱤᱞᱮᱱᱟ᱾ ᱵᱟᱰᱟᱭᱟᱠᱟᱱᱟ ᱡᱮ ᱩᱱᱤ ᱫᱚ ᱳᱠᱥᱯᱷᱳᱨᱰ ᱤᱝᱜᱽᱞᱤᱥ ᱰᱤᱠᱥᱱᱟᱨᱤ ᱦᱚᱸ ᱥᱟᱱᱛᱟᱞᱤᱛᱮ ᱢᱤᱫ ᱦᱤᱸᱥ ᱫᱚᱭ ᱛᱚᱨᱡᱳᱢᱟ ᱥᱟᱹᱛᱞᱮᱫᱟ ᱢᱮᱱᱠᱷᱟᱱ ᱦᱚᱲᱢᱚ ᱳᱥᱩᱠ ᱤᱭᱟᱹᱛᱮ ᱵᱟᱭ ᱯᱩᱨᱟᱹᱣ ᱫᱟᱲᱮᱭᱟᱫᱟ᱾

ᱩᱱᱤ ᱫᱚ ᱯᱟᱨᱚᱢᱮᱱ ᱥᱮᱨᱢᱟ ᱑᱘.᱐᱘.᱒᱐᱒᱐ ᱛᱟᱹᱨᱤᱠ ᱛᱤᱠᱤᱱ ᱵᱮᱞᱟ ᱡᱚᱢ ᱵᱟᱲᱟᱠᱟᱛᱮᱭ ᱜᱤᱛᱤᱡ ᱡᱤᱨᱟᱹᱣᱟᱠᱟᱱ ᱛᱟᱦᱮᱸᱠᱟᱱ ᱡᱚᱠᱷᱮᱡᱜᱮ ᱦᱟᱯᱮ ᱦᱟᱯᱮᱛᱮ ᱡᱤᱣᱤ ᱵᱟᱹᱛᱤ ᱫᱚ ᱡᱟᱭᱡᱩᱜᱽ ᱞᱟᱹᱜᱤᱫ ᱤᱬᱤᱸᱡᱼᱮᱱᱛᱟᱭᱟ᱾ ᱟᱨ ᱱᱳᱝᱠᱟ ᱞᱮᱠᱟ ᱥᱟᱱᱛᱟᱞᱤ ᱥᱟᱶᱦᱮᱸᱫ ᱫᱚ ᱢᱤᱫᱴᱮᱱ ᱡᱟᱹᱡᱤᱞᱢᱟᱱ ᱚᱱᱚᱞᱤᱭᱟᱹ ᱛᱤᱨᱮ ᱡᱩᱜᱮ ᱞᱟᱹᱜᱤᱫᱼᱮ ᱟᱫᱠᱮᱫᱮᱭᱟ᱾

ᱩᱱᱤᱭᱟᱜ ᱤᱨᱟᱹᱞ ᱜᱮᱞ ᱵᱟᱨᱟᱜ ᱡᱟᱱᱟᱢ ᱵᱟᱹᱪᱷᱲᱤᱨᱮ ᱟᱹᱰᱤ ᱟᱭᱢᱟ ᱢᱟᱱᱚᱛ ᱡᱚᱦᱟᱨ

ᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹᱹ